Giotä Abig mitänand und Sali zämä
Scheen dass miär wieder händ derfä zuänich cho,
so sind miär doch gärn vo Giwiu uf Sarnä paddläd
Mä gsed da bekannti aber ai äs paar niwi Gsichter da im KCO
dä Samiglois hed natirlich oi das Jahr sis Buäch mitgno
und dä Schmutzli ä Sack mit feinä Sachä
de wend miär mal liogä was mehr da so vom
KCO so s ganz Jahr zämägsammläd hend
Da fend miär grad mal mit ärä guätä Seel vom KCO aa,
einä wo alziit bereit isch und immer uberal
mithilft und oi nid schiicht sofort ebbis gu zholä wenns
äs brucht we zum Bischpil ä Laubbläser
so etz chemid ihär sicher druf dass das nur isä Gisler Benno
cha si är isch doch dem Klub trii wenä
Hund und das schetzt mä doch sehr im Klub
Dankä diär Benno
Da hend miär no einä womä scho lang nimmä gseh hend
und vilicht hit da isch, das wär dä
Seiler Glais isch är da?
Denn sini Tochter hed da im KCO än Afänger-Kurs bsiocht
Miär hend ai gse das dä Glais bim Sammlä firs
Aqua-Center ä Spänd gmacht hed, wo natirlich am KCO
bim Eskimotiärä oi wieder zgiot chund… vilä Dank
Im wiiterä hend miär da dä Jeffry und sini Andrea
Dä Jeffry isch das Jahr fliisig am rollä gsi uf äm Sarnersee
und wots de oi im Halläbad probiärä
Hed oi am Canadierkurs vom Hugo teil gnu
und chrampfhaft probiärd graduis zfahrä, was de oi
glungä isch bis am Schluss
Är hed oi hend miär vernu churzerhand vom Fischhändler
zum Mammuthändler gwächslät
Ob ächt da diä nachfrag gresser isch,
miär wärdids erfahrä vilicht wärdid etzte alli isi Bärgstiger und
Schitüreler vo Mammut usgrischtät
Ai hend miär gheerd das sie wieder zu is id nechi wend ziä,
das freid is, so wärdid miär si sicher
effters gse und da ja ai d Andrea jetz bi isem Ölscheich
äm Diller Oil schaffäd isch das sicher gäbiger
Und etz einä wo mä da im Klubhuis natirlich oi immer
atrifft isch natirlich isä jungi Hittäwart dä Fischbi Adi
Das isch nid immer sonäs Honigschläker Amt muäs är
doch immer druif und dra si das alläs suiber
und ordentlich hinderla wird,
susch muäs ärs äbä sälber machä,
miär findid är macht das sehr guät
Bsunders isch ihm wieder s uifforschtä vum Rasä
am Härzä glägä, ganz älei hed är dä Rollrasä verleid
und so gar nu dänkt, dass är de wirklich oi
richtig üppig chund tuänich dä nu chli besamä, dä Märtel
und dä Flo wo eigentlich hättid sellä gu hälfä sind froh gsi,
das sie da bim besamä nid dribi gsi sind.
Einzig mit äm Fadämeier da hed är chli Problem
gha är hed eifach nid gwisst wiä ala und är laift hit
nunid denn är hednä hei gnu und eifach i
Eggä gsteud vilicht chenti isä Benno da einisch wiiterhälfä
Ai chent vilicht dr Hugo ihm nu veratä wonär
dä Drikantschlissel versteckt hed nur zum Teschtä ob
ärs nu weiss denn dä Adi hed nä inzwischä sälber
zuäfällig imänä guätä Versteck gfundä
De hemmer einä wo das Jahr so gar nid uifgfallä
isch das isch isä Spanier dä Felipe är hed sich so ganz
unuffällig verhaltä das miär so garniid vo ihm
chend brichtä, vilicht liids aber oi a dem das är si Hund
chli besser im Griff hed, wer weiss
aber scheen bisch dui ai immer cho
iisä Presi, dä Märtel, oi immer ubreall däbi nid
nur bi jeglichä Art vu Kanufahrä sondern ai Schiturä
Chlätterä Wanderä und susch nu alläs,
äbä äs Multitalänt, mit oder ohni Hund Stella wo immer gärn
äs Stäckli hed und einä sucht wo ihrä wägriäd
dä Märtel wott ai ä bsunderi Karierä startä im
KCO und hed sich nämlich äs Slalomboot koift und
wott nächscht Jahr intensiv treniärä fir d Olympiadä.
miär drickid etz scho Duumä
also miär sind iis einig dui machsch das giod
sini Partneri d Conny, hed sich wohl grad vertrikt,
wend miär hiä doch ai nu erwänä, hed si sich doch
s erschtimal id Gischt vum Wildwasser gwagt
und isch zämä mit äm Märtel im Topoduo, ob si sich das
bewusst gsi isch das dä vornä s ganzä Wasser abbechunt,
sage und schreibe uf dä Vorderrii gangä
mä hed gseh diä zwei harmoniärid
denn sie hend das glmurös gmeischteräd
d Conny isch ai eini wo nid lang fakläd
und sofort mit viel Gschik alles a packt wos eppis zmachä gid
und de ainu fir alli Hälfer vum ganzä Jahr äs
feins Pizzaässä mit Pizzaöfeli und allnä feinä Zuätatä
organisird hed dankä vil mal Conny
das wär doch än asporn fir alli wo nid zu dä Hälfer zelld hend,
zum ai mal chli isatz zeigä
Am Misox Usflug heds da nu eppis sältsams gä,
ich glaubä s Team Rapptor isch da involviert gsi
sind doch einigi Biärfläschli uf misteriösi
Art verschwundä wo mä zum Chüälä i Bach gstellt hed
hedmä doch Luscht ufnäs chalts Biär,
doch a dem Platz isch keis einzigs me gsi. tja mä sett hald bi
sonärä Idee au dä Wasserstand iberächnä,
si sind de aber doch hinder Büsch und Stei gfundä wordä
und s letschtä sogar vomänä Chind im See
wieder eppis glehrd hoffentlich
Äs sind da Wörter gfallä wiä Ständer-Hans
oder Angenehm, mär isch sich nunid ganz schlissig wiä
miär etz am Noris wend sägä,
aber eis wissid miär är hed sich sehr giod im KCO gschlagä,
hed fliisig träniärd und so isch är im Kanulager niä gschwummä,
bravo, nur hend diä doch umsverekkä wellä ä
Foti machä wo alli mit Bootbodä nach uifä sind,
dummerwis hed ärs nimmä uifä gschafft und hed
miässä us stiigä, aber das zellämär etz nid, angenehm, wiiter so
D Siri ja d Siri isch de plezlich chli vo dr Bildflächi verschwundä,
zum einä will sie ihri Schulterä
verletzt hed und zum anderä gids da ja nu
anderi Interässi da si jetzt vergä isch und ä Frind hed
Aber hoffemer das mer sie glich nu da gsend
und wer weiss vilicht cha si sich entschliäsä sogar dä J&S
Kanuleiter zmachä, wär doch toll
Etz duänich nu zwei chli vergässlichi erwenä,
vilicht hend si oi vergässä das hit dä Samiglaisabig isch
Im Lager hed doch mal dä Kenny sin Chopf nei
nur dä Helm vergässä mit z näh, äs andersmal hed d
Martina uisgrächnät i dr Abseilstrecki,
womä so wiit muäss ich Bach abälaifä, ihri Spritzdecki
vergässä, dä Elias hed nid lang uberleid
und churzerhand sini gä und fir sich mit viel Gschick eini usärä
Rettigsdecki baschtläd, womä allerdings nid uif
und zuä hed chennä machä zum s Boot lärä, är aber
Hälfer gha hed, zum Boot samt Kajaker uf z stellä zum läärä
Aber diä zwei Kenny und Martina dend ai einiges
zum Klubläbä biträgä, d Martina im Vorstand das
miär immer diä Bricht vo dä Tuirä uf dä
Hompage chend läsä wo all diä Schreiberling verfassid und
dä Kenny wo gsorgt hed das dä Klub
zwei Wavehopper und zwei Regattaboot i
Bestand hed chennä uf näh
Dä voMoos Adi und dä Christoph heds de
oi grad wunder gnu obs diä altä Sek äs paar Meter
schaffid i dänä Regattäboot ohni zkippä
und siehe da nach wenigä Afangsschwirigkeitä hendsi bald ä
Rundi gschafft, so hends de oi anderi nu wellä versuächä
Am jüngschtä am Nino heds im Lager schinbar
au gfallä und isch einä vu dä Fliisigerä gsi bim
abwäschä, wonich so gherd ha dass äs settigi
gä hed wo sich chli drickt hend, ob das so isch lemmer
jetzt la stah. De chemermär doch jetzt zur Vivi
Als erschts mecht ich ihrä zu dem Glamurösä
Abschluss vu ihrer Lehr gratuliärä, und das mit
Uszeichnig Sie isch au sehr beschäftigt mit äm
Jubiläumsbuäch vom KCO,
gid alläs um da äs tolls Wärk z erstellä,
miär sind gspannt.
Zudem isch si ä risigä Fan vu Autorennä
worde sit sie ä Fründ hed, ich gaubä sie sägid ihm dä Sushi-
Hampi, wo sälber fahrd, so begleitäd sie ihn
rund umä Globus zu dä Rennstreckinä
Isch si doch firä Nachwuchs im Klub zuäständig
und so hoffid miär doch sehr dass du glich nochli Zyt
gfindsch um mit dinä Kanukolleginnä und Kollegä ufs Wasser zga
Da wärid etz nu d Livia und dä Kili
Zudä Livia chanich sägä dass sie am Misox Boater-X
bis is Final gschaft hed, da sind miär Stolz sonä
guäti Kajakeri im Klub zha
Näbscht dem dass sie im Vorstand vom Klub
mitwirkt, duäd sie nu S Hallätraining leitä, wo ich gherd
han das äs settigi gid wo am anderä Tag
scho chli glittä hend nach dem hertä Training, aber ich dänkä
das liid eher a dem, das nimmä alli so jung und dynamisch sind.
Dä Kili oi är hed sich das Jahr s erschtimal
ufs Wildwasser gwagt und hed sich uf dä Simmä und Saanä
de nu sehr guäd gmeischterä, aber ja är zelld ja au nu zu dä eher Jüngerä.
Aber ja bim Wanderä, da hed zum einä d Stella
garnid freud wemä ihräs Stöckli so riärd das sis
nimmä gfind und zum anderä liäbä Kili isch
mä doch idä Natuir ussä wo mä sett Gägend chli gniässä
und nid bim lauffä ufäm Händy Schirennä liogä
Doch s Alter macht sich bi ihm glich chli bemerkbar,
mag är doch 2 KCO Aläss nachänand nimmä so
giod verliidä oder liids ächt dra,
das dä Presi dä Mommänt verpasst hed,
womä niime sett bstellä
Dä Heli und S Ursi gsemmer doch ai immer
wieder gärn im Training oder a dä Aläss
Heli wiä chunsch vorwärts mit äm OK firs Jubiläum,
ha gherd das sett ai scho necher rickä
Dä Pädi hemmer dä Summer oi wieder efters gse adä Traings,
das isch scheen und är hed sich grad
im niiwä griänä Wavehopper zrächt gfundä
und isch flissig mit dem ufäm Wasser gsi
giod so Pädi. Ich ha da nu gherd iär heigid a
niiwä im Klub einä vu änädra Nid dem Wald wo etz da zu denä Ob
dem Wald chund gu Paddlä, är isch wohl grad uf dä Schissi,
ich glaibä äs gfaud ihm ganz guäd da bi
derä uifgstelltä Gsellschaft das är immer eppä
uiftaicht isch, dä Flichtling isch aber oi wirklich ohni
Vorbehalt i dem Klub uifgnu wordä
und ich ha ai vernu obwohl är nu nid ämal im Klub uifgnu isch,
scho ä Bootsplatz und sogar ä Schlissu ubercho hed,
wo anderi jahrelang hend miässä wartä
Im Canadier isch är nu nidäso dä Hirsch gsi
und hed sich grad muätig zu dä Kanadiertuir nach Basel
agmäldet mit sim Sohn zwar jung und chräftig und ä guätä Kanut aber oi nid Kanadierprofi, nach afänglichä Bedänkä beidsitig hend
sie sich doch guäd gmeischteräd, usser am zweitä Tag nu halb
verschlafä churz nachäm Start sonä Wirbu sie
packt hed und einisch Boot und Mänsch gwäschä hed
das sie de wach gsi sind.
So jetz wend mir nimmä lenger wärdä,
äs gäbt nu so vieli Eppisodä zferzellä, dä Samiglois findet ihr
sind ä tollä Klub und miär land eych etz nu chli la fiirä und gend etz wiiter zum nechschtä Kanuclub
wo dä Samiglois chli bedänkä hed wiäs det im Klub so laift.
Nid vergässä, GV am 14. Januar 2023
Det isch ja under anderem d Abstimmig uber d uifnahm vum Samiglois i KCO
Hebids giod
Bis im nechschtä Jahr
